Londonning «Arsenal» klubi yarim himoyachisi Noni Madueke Chempionlar ligasi 1/4 final uchrashuvi oldidan o‘tkazilgan matbuot anjumanida murabbiy Mikel Arteta bilan ishlash jarayoni haqida qisqacha to‘xtalib o‘tdi. 7 aprel kuni uning jamoasi safarda Lissabonning «Sporting» klubiga qarshi maydonga tushadi, uchrashuv Toshkent vaqti bilan tungi soat 00:00 da boshlanadi.
«U ajoyib murabbiy. Juda faol va mayda detallargacha e’tiborli. U o‘yinimning ayrim jihatlarini yaxshilashga yordam berdi, harakatlarimni tizimliroq ko‘rinishga keltirdi. Shu bilan birga, u o‘zligimni saqlab qolishimga ham xalaqit bermaydi», — deya Maduekening so‘zlaridan iqtibos keltiradi UYEFA rasmiy sayti.
Arteta 2019 yildan beri «Arsenal»ni boshqarib kelmoqda. Madueke esa jamoaga 2025 yilda «Chelsi»dan 56 million yevro evaziga kelib qo‘shilgan edi.
