Лондоннинг «Арсенал» клуби ярим ҳимоячиси Нони Мадуэке Чемпионлар лигаси 1/4 финал учрашуви олдидан ўтказилган матбуот анжуманида мураббий Микель Артета билан ишлаш жараёни ҳақида қисқача тўхталиб ўтди. 7 апрель куни унинг жамоаси сафарда Лиссабоннинг «Спортинг» клубига қарши майдонга тушади, учрашув Тошкент вақти билан тунги соат 00:00 да бошланади.

«У ажойиб мураббий. Жуда фаол ва майда деталларгача эътиборли. У ўйинимнинг айрим жиҳатларини яхшилашга ёрдам берди, ҳаракатларимни тизимлироқ кўринишга келтирди. Шу билан бирга, у ўзлигимни сақлаб қолишимга ҳам халақит бермайди», — дея Мадуэкенинг сўзларидан иқтибос келтиради УЕФА расмий сайти.

Артета 2019 йилдан бери «Арсенал»ни бошқариб келмоқда. Мадуэке эса жамоага 2025 йилда «Челси»дан 56 миллион евро эвазига келиб қўшилган эди.