Afrika Millatlar Kubogi saralashi doirasidagi Esvatini bilan bahsdan so‘ng (2:1 hisobida Eritreya g‘alaba qozongan) mehmon jamoaning yetti nafar futbolchisi g‘oyib bo‘ldi. O‘yin Esvatinida bo‘lib o‘tgan, biroq qochib ketgan ayrim futbolchilar JAR (Janubiy Afrika Respublikasi) hududida ko‘rilgani aytilmoqda, deb xabar beradi BBC.
Eritreya davlat OAVlari odatda katta tantana bilan kutib olinadigan jamoaning qaytishi haqidagi vaziyatga izoh bermayapti. Manbaga ko‘ra, futbolchilarni kutib olish uchun tayyorgarlik ko‘rilgan, biroq o‘yinchilar yo‘qolgani haqidagi xabardan so‘ng tadbir bekor qilingan.
Eritreya Sport va madaniyat komissiyasi vakili ijtimoiy tarmoqlarda jamoaning ba’zi a’zolari va xodimlari Misrda bo‘lib turgani aks etgan suratlarni joylashtirdi. Qayd etilishicha, Qohiradagi Eritreya elchixonasi va mahalliy jamoatchilik ular uchun qabul tashkil qilgan. Futbolchilar vatanga qaytish yo‘lida Qohirada to‘xtab o‘tishgan.
Huquqni muhofaza qilish tashkilotlari Eritreya hukumatining harakatlarini o‘ta repressiv deb ta’riflaydi, garchi rasmiy hukumat bu ayblovlarni inkor etsa-da. So‘nggi 20 yil ichida Eritreya terma jamoasi a’zolari yoki butun tarkibning xorijdagi o‘yinlardan so‘ng qochib ketishi bilan bog‘liq holatlar tez-tez kuzatilmoqda:
2019 yil: Ugandadagi musobaqadan so‘ng U20 terma jamoasining 7 nafar o‘yinchisi g‘oyib bo‘lgan.
2015 yil: Botsvanadagi o‘yindan so‘ng asosiy tarkibning 10 nafar futbolchisi uyga qaytishdan bosh tortgan.
Ikki yil avval: Ugandada jamoaning 15 nafar futbolchisi va shifokoriga boshpana berilgan.
2009 yil: Keniyadagi musobaqadan so‘ng murabbiy va bir nafar rasmiy shaxsdan tashqari butun jamoa uyga qaytmagan.
