Африка Миллатлар Кубоги саралаши доирасидаги Эсватини билан баҳсдан сўнг (2:1 ҳисобида Эритрея ғалаба қозонган) меҳмон жамоанинг етти нафар футболчиси ғойиб бўлди. Ўйин Эсватинида бўлиб ўтган, бироқ қочиб кетган айрим футболчилар ЖАР (Жанубий Африка Республикаси) ҳудудида кўрилгани айтилмоқда, деб хабар беради BBC.

Эритрея давлат ОАВлари одатда катта тантана билан кутиб олинадиган жамоанинг қайтиши ҳақидаги вазиятга изоҳ бермаяпти. Манбага кўра, футболчиларни кутиб олиш учун тайёргарлик кўрилган, бироқ ўйинчилар йўқолгани ҳақидаги хабардан сўнг тадбир бекор қилинган.

Эритрея Спорт ва маданият комиссияси вакили ижтимоий тармоқларда жамоанинг баъзи аъзолари ва ходимлари Мисрда бўлиб тургани акс этган суратларни жойлаштирди. Қайд этилишича, Қоҳирадаги Эритрея элчихонаси ва маҳаллий жамоатчилик улар учун қабул ташкил қилган. Футболчилар ватанга қайтиш йўлида Қоҳирада тўхтаб ўтишган.

Ҳуқуқни муҳофаза қилиш ташкилотлари Эритрея ҳукуматининг ҳаракатларини ўта репрессив деб таърифлайди, гарчи расмий ҳукумат бу айбловларни инкор этса-да. Сўнгги 20 йил ичида Эритрея терма жамоаси аъзолари ёки бутун таркибнинг хориждаги ўйинлардан сўнг қочиб кетиши билан боғлиқ ҳолатлар тез-тез кузатилмоқда:

2019 йил: Угандадаги мусобақадан сўнг U20 терма жамоасининг 7 нафар ўйинчиси ғойиб бўлган.

2015 йил: Ботсванадаги ўйиндан сўнг асосий таркибнинг 10 нафар футболчиси уйга қайтишдан бош тортган.

Икки йил аввал: Угандада жамоанинг 15 нафар футболчиси ва шифокорига бошпана берилган.

2009 йил: Кениядаги мусобақадан сўнг мураббий ва бир нафар расмий шахсдан ташқари бутун жамоа уйга қайтмаган.