«Real» hujumchisi Kilian Mbappe «Bavariya»ga qarshi o‘yinda hisobdagi farqni qisqartirdi.

«Madrid» o‘z maydonida Chempionlar ligasi chorak finalining dastlabki uchrashuvi doirasida «Bavariya»ni qabul qildi (1:2). Uchrashuvni angliyalik hakam Maykl Oliver boshqardi.

O‘yinning 74-daqiqasida himoyachi Trent Aleksander-Arnold o‘ng qanotdan «Bavariya» jarima maydonchasi ichiga kesma uzatma berdi, Mbappe esa himoyachilardan oldinroq harakat qilib, yaqin masofadan to‘pni Manuel Noyer darvozasiga yo‘lladi.

Bu fransuz futbolchisi uchun joriy Chempionlar ligasining 10 ta o‘yinidagi 14-gol bo‘ldi. U to‘purarlar poygasida «Bavariya» a’zosi Xarri Keyndan 3 ta golga oldinda borib, peshqadamlik qilmoqda.

Musobaqaning bitta mavsumida Kiliandan ko‘proq gol urishga faqat Karim Benzema, Robert Levandovski va Krishtianu Ronaldu muvaffaq bo‘lishgan.