Qozog‘istonlik shaxmatchi Alua Nurman Germaniyadagi Grenke Open turnirida nafaqat sovrinli o‘rinni qo‘lga kiritdi, balki kutilmaganda internet yulduziga ham aylandi.

Turnirning eng ko‘p muhokama qilingan voqealaridan biri Aluaning dunyoning eng kuchli shaxmatchisi Magnus Karlsen bilan tushgan surati bo‘ldi. Alua bunday e’tiborni umuman kutmaganini tan oldi. Qiziqarli jihati shundaki, Magnus bilan suratga tushish g‘oyasini unga fransiyalik grossmeyster Eten Bakro bergan.

“O‘tgan yili Bakro ham Magnus bilan xuddi shunday selfi tushganini ko‘rib, men ham omadimni sinab ko‘rishga qaror qildim. Ammo bu surat bunday shov-shuvga sabab bo‘lishini tasavvur ham qilmagandim”, deydi Alua.

Tarmoqlarda qizg‘in muhokamalarga sabab bo‘lgan yana bir vaziyat — Magnus va Alua o‘rtasidagi o‘yin paytida yuzaga kelgan kichik tushunmovchilik bo‘ldi.  Karlsen o‘yin oldidan Nurman bilan selfiga tushdi, biroq qoidalarga ko‘ra hakamdan uning telefonini olib qo‘yishni so‘radi. Ko‘pchilik buni ziddiyat sifatida talqin qilgan bo‘lsa-da, shaxmatchi qiz aslida nima bo‘lganiga oydinlik kiritdi.

“Bu mutlaqo oddiy holat edi. Magnus hech qanday e’tiroz bildirmadi, u shunchaki o‘yin qoidalariga qat’iy amal qilinishini istadi, xolos”.

Magnus bilan bo‘lgan selfi voqeasi soyasida Aluaning natijalari ham e’tibordan chetda qolmadi. U ayollar o‘rtasidagi bahslarda kuchli uchlikka kirdi va freestyle bo‘yicha Jahon chempionatiga yo‘llanmani qo‘lga kiritdi.

“Bu men uchun klassik vaqt nazorati ostida freestyle o‘ynash bo‘yicha birinchi tajriba edi. Shunchaki o‘yin jarayonidan zavq oldim va yakunda shunday katta yutuqqa erishdim”, deya qo‘shimcha qildi qozog‘istonlik shaxmatchi.

E’tiborli tomoni shundaki, ushbu surat Aluaning Instagram sahifasida yarim milliondan ortiq layk to‘pladi. Shuningdek, bu shov-shuv ortidan uning obunachilari soni qisqa vaqt ichida 20 mingtaga ko‘paydi.​