"PSJ" yarim himoyachisi Vitinya Chempionlar Ligasi chorak finalidan o‘rin olgan "Liverpul"ga qarshi dastlabki o‘yin oldidan o‘tkazilgan matbuot anjumanida sobiq jamoadoshi Ugo Ekitike haqida to‘xtalib o‘tdi. Fransiyalik hujumchi 2025 yilning yozida "Liverpul"ga o‘tgan edi.
"U ajoyib yigit, u bilan birga o‘tkazgan yilim menga juda yoqdi. Afsuski, Parijda uning ishlari unchalik yurishmadi, lekin u hamma narsani o‘z foydasiga o‘zgartira oldi. Unga eng yaxshi tilaklarimni tilayman, ammo ushbu ikki o‘yinda emas", — deya futbolchining so‘zlarini keltiradi UYEFA sayti.
Ekitike parijliklar safida 33 ta o‘yinda 4 ta gol va 4 ta golli uzatma bilan ajralib turgan edi. Joriy mavsumda "Liverpul" tarkibida 43 ta uchrashuvda maydonga tushgan 23 yoshli futbolchi 17 bor raqiblar darvozasini ishg‘ol qildi va 6 ta golli uzatmani amalga oshirdi.
"PSJ" va "Liverpul" o‘rtasidagi dastlabki o‘yin 8 aprel oqshomida bo‘lib o‘tadi.
