"ПСЖ" ярим ҳимоячиси Витинья Чемпионлар Лигаси чорак финалидан ўрин олган "Ливерпуль"га қарши дастлабки ўйин олдидан ўтказилган матбуот анжуманида собиқ жамоадоши Уго Экитике ҳақида тўхталиб ўтди. Франциялик ҳужумчи 2025 йилнинг ёзида "Ливерпуль"га ўтган эди.
"У ажойиб йигит, у билан бирга ўтказган йилим менга жуда ёқди. Афсуски, Парижда унинг ишлари унчалик юришмади, лекин у ҳамма нарсани ўз фойдасига ўзгартира олди. Унга энг яхши тилакларимни тилайман, аммо ушбу икки ўйинда эмас", — дея футболчининг сўзларини келтиради УЕФА сайти.
Экитике парижликлар сафида 33 та ўйинда 4 та гол ва 4 та голли узатма билан ажралиб турган эди. Жорий мавсумда "Ливерпуль" таркибида 43 та учрашувда майдонга тушган 23 ёшли футболчи 17 бор рақиблар дарвозасини ишғол қилди ва 6 та голли узатмани амалга оширди.
"ПСЖ" ва "Ливерпуль" ўртасидаги дастлабки ўйин 8 апрель оқшомида бўлиб ўтади.
