Madridning «Real» klubi bosh murabbiyi Alvaro Arbeloa La Liganing 31-turi doirasidagi «Jirona»ga qarshi o‘yin oldidan turnir jadvalidagi holat va chempionlik uchun kurash haqida o‘z fikrlarini bildirdi. Hozirda «Barselona» madridliklarni 7 ochkoga ortda qoldirmoqda.

«Biz uchun har bir o‘yin juda muhim ekanligini tushunib turibmiz. Agar ilgari xato qilishga haqqimiz deyarli bo‘lmagan bo‘lsa, hozir bu imkoniyat yanada kamaygan. Maqsadimiz — har bir o‘yinda g‘alaba qozonish. Toki imkoniyat bor ekan, biz kurashamiz. Agar qachondir imkoniyat qolmasa ham, baribir xuddi shunday kurashishda davom etamiz. Bu o‘zgarmaydi; biz kim ekanligimizni, ko‘kragimizdagi emblema qanday mas’uliyat yuklashini va talablarni yaxshi bilamiz. Biz bunga tayyormiz», — dedi Arbeloa klub rasmiy saytiga.