Muhammad Kudus futbol bo‘yicha jahon chempionatini o‘tkazib yuborish xavfi ostida qoldi.

O‘tgan yozda «Tottenhem» tomonidan 55 million funt evaziga sotib olingan Gana terma jamoasi yarim himoyachisi yanvar oyida sonidan jarohat olgan edi va o‘shandan beri maydonga tushgani yo‘q.

Kecha «shporlar» o‘tgan haftada umumiy guruh mashg‘ulotlariga qaytgan 25 yoshli futbolchida eski jarohati qaytalanganini ma’lum qilishdi. Endi unga jarrohlik amaliyoti talab etilishi mumkin.

Joriy mavsumda Kudus APLning 19 ta o‘yinida qatnashib, 6 ta golli uzatmani amalga oshirgan — bu hozirgacha «Tottenhem»dagi eng yaxshi ko‘rsatkich bo‘lib turibdi.