«Barselona» bosh murabbiyi Xansi Flik La Liga doirasidagi «Espanyol»ga qarshi o‘yin oldidan o‘tkazilgan matbuot anjumanida Chempionlar ligasidagi «Atletiko»dan uchralgan mag‘lubiyat (0:2) fonida VAR tizimi haqida gapirib o‘tdi.
O‘yinning ikkinchi bo‘limida madridliklar posboni Xuan Musso to‘pni yerga qo‘yib, uni jamoadoshi Mark Pubil tomon oyog‘i bilan dumalatib bergan edi. Himoyachi esa darvozabon maydonchasi chizig‘ida to‘pni qo‘li bilan to‘xtatib, so‘ngra yana oyog‘i bilan darvozabonga qaytargan. Biroq bosh hakam Ishtvan Kovach ushbu vaziyatga e’tibor qaratmagan.
«Bizda VAR tizimi mavjudligining sababi — agar tizim qandaydir xatoni payqasa, hakamning qarorini tuzatishi lozim. Aynan mana shu narsa o‘tgan o‘yinda yetishmadi.
Albatta, o‘zimiz ham eng yaxshi o‘yinimizni ko‘rsata olmaganimiz va xatolarga yo‘l qo‘yganimiz rost. Bu bizga foyda bermadi va bu kabi xatolar o‘yin taqdirini hal qilishga yordam berdi», — dedi Xansi Flik.
