«Tottenxem Xotspur»ning yangi bosh murabbiyi Roberto De Dzerbi London jamoasiga o‘tgani haqida to‘xtalib, o‘zini klubdan bo‘shatilgan Tomas Frank va Igor Tudordan ustun deb hisoblamasligini ta’kidladi.

«Avvalo, shu yerda ekanligimdan faxrlanaman va xursandman. Venkatesham va Langega (jamoa sport direktorlari) minnatdorchilik bildirmoqchiman, chunki ular menga katta ishonch bag‘ishlashmoqda. Endi ishlash va ochko to‘plash kerak. Futbolchilarning darajasiga ishonaman, chunki ilgari ularning ko‘pchiligini sobiq jamoalarimga olib kelishga juda yaqin kelgandim. Ular juda yaxshi ishlashmoqda.

Menimcha, men Tomas Frank yoki Igor Tudordan yaxshiroq emasman, chunki ularni juda kuchli murabbiylar deb hisoblayman. Men futbolchilarga o‘z sifatlarini ko‘rsatishda yordam berish uchun o‘z uslubim, xarakterim, shaxsiyatim va ishtiyoqimni olib kirishga harakat qilaman. Ularda iqtidor yetarli, asosiysi esa — hozirgi maqsadimizga erishishdir», — deya De Dzerbining so‘zlarini keltirmoqda «Tottenxem» rasmiy sayti.

APL turnir jadvalida «Tottenxem» 31 turdan so‘ng 30 ochko bilan 17-o‘rinni egallab turibdi. Chempionshipga tushib ketish hududidan jamoani bor-yo‘g‘i bir ochko ajratib turibdi.