«Тоттенхэм Хотспур»нинг янги бош мураббийи Роберто Де Дзерби Лондон жамоасига ўтгани ҳақида тўхталиб, ўзини клубдан бўшатилган Томас Франк ва Игор Тудордан устун деб ҳисобламаслигини таъкидлади.
«Аввало, шу ерда эканлигимдан фахрланаман ва хурсандман. Венкатешам ва Лангега (жамоа спорт директорлари) миннатдорчилик билдирмоқчиман, чунки улар менга катта ишонч бағишлашмоқда. Энди ишлаш ва очко тўплаш керак. Футболчиларнинг даражасига ишонаман, чунки илгари уларнинг кўпчилигини собиқ жамоаларимга олиб келишга жуда яқин келгандим. Улар жуда яхши ишлашмоқда.
Менимча, мен Томас Франк ёки Игор Тудордан яхшироқ эмасман, чунки уларни жуда кучли мураббийлар деб ҳисоблайман. Мен футболчиларга ўз сифатларини кўрсатишда ёрдам бериш учун ўз услубим, характерим, шахсиятим ва иштиёқимни олиб киришга ҳаракат қиламан. Уларда иқтидор етарли, асосийси эса — ҳозирги мақсадимизга эришишдир», — дея Де Дзербининг сўзларини келтирмоқда «Тоттенхэм» расмий сайти.
АПЛ турнир жадвалида «Тоттенхэм» 31 турдан сўнг 30 очко билан 17-ўринни эгаллаб турибди. Чемпионшипга тушиб кетиш ҳудудидан жамоани бор-йўғи бир очко ажратиб турибди.
