«Yuventus» bosh direktori Damyen Komolli jamoa bosh murabbiyi Luchano Spalletti 2028 yilgacha mo‘ljallangan yangi shartnomaga imzo chekkanidan so‘ng o‘z quvonchini yashirib o‘tirmadi. Bu haqda Football Italia xabar bermoqda.
«Luchano bizning oilamizga qo‘shilganidan beri o‘yinchilarimizga, butun klubga va «byankoneri»larning barcha jamiyatiga zudlik bilan va juda ijobiy ta’sir ko‘rsatdi. Luchano jamoani o‘sish yo‘lidan boshlab boradigan aynan o‘sha inson ekani hammaga darhol ayon bo‘ldi», — dedi Komolli.
Eslatib o‘tamiz, Spalletti 2025 yil 30 oktyabrda Igor Tudorning o‘rnini egallab, «Yuventus» boshqaruvini qo‘lga olgan edi. Hozirda jamoa 31 o‘yindan so‘ng 57 ochko jamg‘argan holda chempionatda beshinchi o‘rinda bormoqda.
