Madridning «Real» klubi La Ligada yana ochko yo‘qotdi. «Qaymoqranglilar» chempionatning 31-turi doirasida juma kuni bo‘lib o‘tgan bahsda o‘z maydonida «Jirona»ni mag‘lub eta olmadi (1:1).
Ispaniya OAVlarining qayd etishicha, Alvaro Arbeloa jamoa boshqaruvidagi dastlabki 20 ta o‘yinda o‘tkazib yuborilgan gollar soni bo‘yicha (24 ta gol) «Real»ning XXI asrdagi murabbiylari orasida antirekord o‘rnatdi.
Arbeloa bosh murabbiylik lavozimini shu yilning yanvar oyida, iste’foga chiqarilgan Xabi Alonsoning o‘rnida egallagan edi. Madrid grandining turnir jadvali peshqadami «Barselona»dan ortda qolishi 6 ochkoni tashkil etmoqda, shu bilan birga, «ko‘k-anorranglilar» ixtiyorida bitta zaxira o‘yini mavjud — ular shanba kuni «Espanyol» bilan kuch sinashadilar.
