Мадриднинг «Реал» клуби Ла Лигада яна очко йўқотди. «Қаймоқранглилар» чемпионатнинг 31-тури доирасида жума куни бўлиб ўтган баҳсда ўз майдонида «Жирона»ни мағлуб эта олмади (1:1).

Испания ОАВларининг қайд этишича, Альваро Арбелоа жамоа бошқарувидаги дастлабки 20 та ўйинда ўтказиб юборилган голлар сони бўйича (24 та гол) «Реал»нинг XXI асрдаги мураббийлари орасида антирекорд ўрнатди.

Арбелоа бош мураббийлик лавозимини шу йилнинг январь ойида, истеъфога чиқарилган Хаби Алонсонинг ўрнида эгаллаган эди. Мадрид грандининг турнир жадвали пешқадами «Барселона»дан ортда қолиши 6 очкони ташкил этмоқда, шу билан бирга, «кўк-анорранглилар» ихтиёрида битта захира ўйини мавжуд — улар шанба куни «Эспаньол» билан куч синашадилар.