Madridning «Real» klubi bosh murabbiyi Alvaro Arbeloa jamoasining navbatdagi muvaffaqiyatsizligidan so‘ng chempionlik poygasi haqidagi fikrlari bilan o‘rtoqlashdi.
Juma kuni «qaymoqranglilar» «Santyago Bernabeu»da kechgan «Jirona»ga qarshi bahsda ochko yo‘qotishdi (1:1). Ertagayoq madridliklarning «Barselona»dan ortda qolishi 9 ochkogacha yetishi mumkin — buning uchun Xans-Diter Flik jamoasi derbida «Espanyol»ni mag‘lub etishi lozim.
«Chempionlik poygasi yakunlandimi? Biz to matematik imkoniyat saqlanib qolar ekan, oxirgi kungacha kurashamiz. Biz — «Real»miz va hech qachon taslim bo‘lmaymiz», — dedi Arbeloa matbuot anjumanida.
Keyingi turda, 21 aprel kuni «Real» «Alaves» bilan to‘qnash keladi. Unga qadar esa jamoa Chempionlar ligasi 1/4 finali doirasida «Bavariya»ga qarshi javob uchrashuvini o‘tkazishi kerak.
