Мадриднинг «Реал» клуби бош мураббийи Альваро Арбелоа жамоасининг навбатдаги муваффақиятсизлигидан сўнг чемпионлик пойгаси ҳақидаги фикрлари билан ўртоқлашди.
Жума куни «қаймоқранглилар» «Сантьяго Бернабеу»да кечган «Жирона»га қарши баҳсда очко йўқотишди (1:1). Эртагаёқ мадридликларнинг «Барселона»дан ортда қолиши 9 очкогача етиши мумкин — бунинг учун Ханс-Дитер Флик жамоаси дербида «Эспаньол»ни мағлуб этиши лозим.
«Чемпионлик пойгаси якунландими? Биз то математик имконият сақланиб қолар экан, охирги кунгача курашамиз. Биз — «Реал»миз ва ҳеч қачон таслим бўлмаймиз», — деди Арбелоа матбуот анжуманида.
Кейинги турда, 21 апрель куни «Реал» «Алавес» билан тўқнаш келади. Унга қадар эса жамоа Чемпионлар лигаси 1/4 финали доирасида «Бавария»га қарши жавоб учрашувини ўтказиши керак.
