MLSning "Inter Mayami" klubi braziliyalik yarim himoyachi Kazemiroga transfer borasida taklif bilan chiqdi. Bu haqda jurnalist Nikolo Skira xabar bermoqda.

Manba bergan ma’lumotlarga ko‘ra, Kazemironing erkin agent sifatida MLSga o‘tishi bo‘yicha muzokaralar yuqori bosqichda turibdi. Futbolchi faoliyatini AQSHda davom ettirish ishtiyoqida va iyul oyida jamoaga qo‘shilishi mumkin. Tomonlar 2028 yilning dekabrigacha mo‘ljallangan shartnomani imzolashi kutilmoqda.

O‘tgan qishda Kazemiro "Manchester Yunayted"ni tark etish niyati borligini e’lon qilgan edi. Braziliyalik futbolchining klub rivojiga qo‘shgan hissasiga hurmat sifatida, "MYU" rahbariyati uning shartnomasini yana 1 yilga uzaytirish bandidan foydalanmaslikka qaror qildi.

Joriy mavsumda 34 yoshli futbolchi "qizil iblislar" libosida 30 ta o‘yinda maydonga tushib, 7 ta gol urdi va 2 ta golli uzatmani amalga oshirdi. Transfermarkt portali ma’lumotlariga ko‘ra, uning ayni damdagi bozor qiymati 8 million yevroni tashkil etadi.