МЛСнинг "Интер Майами" клуби бразилиялик ярим ҳимоячи Каземирога трансфер борасида таклиф билан чиқди. Бу ҳақда журналист Николо Скира хабар бермоқда.
Манба берган маълумотларга кўра, Каземиронинг эркин агент сифатида МЛСга ўтиши бўйича музокаралар юқори босқичда турибди. Футболчи фаолиятини АҚШда давом эттириш иштиёқида ва июль ойида жамоага қўшилиши мумкин. Томонлар 2028 йилнинг декабригача мўлжалланган шартномани имзолаши кутилмоқда.
Ўтган қишда Каземиро "Манчестер Юнайтед"ни тарк этиш нияти борлигини эълон қилган эди. Бразилиялик футболчининг клуб ривожига қўшган ҳиссасига ҳурмат сифатида, "МЮ" раҳбарияти унинг шартномасини яна 1 йилга узайтириш бандидан фойдаланмасликка қарор қилди.
Жорий мавсумда 34 ёшли футболчи "қизил иблислар" либосида 30 та ўйинда майдонга тушиб, 7 та гол урди ва 2 та голли узатмани амалга оширди. Transfermarkt портали маълумотларига кўра, унинг айни дамдаги бозор қиймати 8 миллион еврони ташкил этади.
