«Napoli» prezidenti Aurelio De Laurentis klubni qanday qilib qo‘lga kiritgani haqidagi xotiralari bilan o‘rtoqlashdi.
«2004 yilda men Los-Anjelesda edim — bir nechta mashhur aktyorlar ishtirokidagi filmni suratga olayotgandik. Bir mahal uch haftalik yozgi ta’tilga ehtiyoj sezdim va Kapri oroliga yo‘l oldim.
U yerga borganimda kimdir menga gazeta uzatdi. Unda qaysidir odam «Napoli»ni 5 mln yevroga sotib olayotganini o‘qib qoldim. «Napoli»ni sotib olish? Qanday qilib?» — deb hayron bo‘ldim. Menga: «Napoli» endi yo‘q, klub bankrot bo‘ldi», deb javob berishdi. Keyin mendan uni sotib olishni istaymanmi-yo‘qmi, so‘rashdi. Men o‘ylab ko‘rish uchun biroz vaqt so‘radim.
Bankrotlikdan so‘ng klub auksionga qo‘yildi. O‘g‘lim Luiji va rafiqam Jaklin shokka tushishdi: «Esingni yedingmi? Sen futbol haqida hech narsa bilmaysan-ku!» Lekin men biznesmenman, bu esa yangi va hayajonli sarguzasht bo‘lib tuyuldi. Men pul tikdim, lekin aslida shunchaki bir parcha qog‘ozni sotib olgandim: o‘yinchilar yo‘q edi, boshqa hech narsa mavjud emasdi. Hatto ishni nimadan boshlashni ham bilmasdim».
De Laurentisning so‘zlariga ko‘ra, federasiya klub A Seriyada emas, balki S Seriyada ishtirok etishini ma’lum qilgan. Shu tariqa Italiya janubi bo‘ylab uzoq yo‘l boshlangan.
«Birinchi qadamlar juda og‘ir kechdi: ba’zan kiyinish xonalarida soatlab yashirinib o‘tirishga majbur bo‘lardim — atrofdagilar juda tajovuzkor kayfiyatda edi. «Napoli» ilgari hech qachon S Seriyada o‘ynamagan. Bu juda qiyin edi, lekin men uchun sodir bo‘layotgan voqealar hayotimdagi eng yaxshi filmni eslatardi.
A Seriyaga qaytish uchun bizga uch yil kerak bo‘ldi va biz buni uddaladik. Men katta faxr tuyardim: sekin-asta futbol sirlarini o‘rgandim va jamoa muvaffaqiyatga erishdi. Biz ketma-ket 15 yil davomida Yevropa musobaqalarida qatnashgan yagona jamoaga aylandik. Bugun muxlislar bilan munosabatlarimiz shunchaki fantastik darajada», — deya De Laurentisning so‘zlarini keltirmoqda CBS Sports.
Ma’lumot uchun: De Laurentis 2004 yilgi bankrotlikdan so‘ng klubni qayta tikladi va 2006 yilda unga tarixiy — Società Sportiva Calcio Napoli nomini qaytardi. Uning davrida Neapol klubi 2022/2023 va 2024/2025 yilgi mavsumlarda A Seriya chempionligini qo‘lga kiritdi. Shuningdek, «Napoli» uning rahbarligida uch marta Italiya Kubogi va ikki marta (2014 va 2025 yillarda) Italiya Superkubogida zafar quchdi.
