«Manchester Yunayted», «Manchester Siti», «Chelsi» va Madridning «Real» klublari «Bavariya» yarim himoyachisi Aleksandar Pavlovich borasida so‘rov yuborishdi. Biroq, ularga 21 yoshli futbolchi transfer uchun yopiq ekanligi haqida javob qaytarildi. Bu haqda TEAMtalk nashri xabar bermoqda.
Manbaning ma’lumotiga ko‘ra, Myunxen klubi Pavlovich bo‘yicha hech qanday taklifni ko‘rib chiqish niyatida emas. Germaniyalik futbolchining o‘zi ham «Bavariya»ni tark etishni istamayapti va uzoq muddatli istiqbolda jamoaning asosiy yarim himoyachisi sifatida mustahkam o‘rin egallamoqchi.
Joriy mavsumda Pavlovich barcha turnirlarda 37 ta o‘yinda ishtirok etib, o‘z hisobiga 3 ta gol va bitta golli uzatmani yozdirib qo‘ydi. Futbolchining klub bilan amaldagi shartnomasi 2029 yilning yoziga qadar mo‘ljallangan. Transfermarkt portali ma’lumotlariga ko‘ra, uning bozor qiymati 75 million yevroni tashkil etadi.
