«Манчестер Юнайтед», «Манчестер Сити», «Челси» ва Мадриднинг «Реал» клублари «Бавария» ярим ҳимоячиси Александар Павлович борасида сўров юборишди. Бироқ, уларга 21 ёшли футболчи трансфер учун ёпиқ эканлиги ҳақида жавоб қайтарилди. Бу ҳақда TEAMtalk нашри хабар бермоқда.

Манбанинг маълумотига кўра, Мюнхен клуби Павлович бўйича ҳеч қандай таклифни кўриб чиқиш ниятида эмас. Германиялик футболчининг ўзи ҳам «Бавария»ни тарк этишни истамаяпти ва узоқ муддатли истиқболда жамоанинг асосий ярим ҳимоячиси сифатида мустаҳкам ўрин эгалламоқчи.

Жорий мавсумда Павлович барча турнирларда 37 та ўйинда иштирок этиб, ўз ҳисобига 3 та гол ва битта голли узатмани ёздириб қўйди. Футболчининг клуб билан амалдаги шартномаси 2029 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 75 миллион еврони ташкил этади.