Germaniyaning “Union” klubi “Haydenhaym”ga imkoniyatni boy bergach, bosh murabbiy Steffen Baumgartni iste’foga chiqardi va mavsum yakuniga qadar jamoani Mari-Luiza Eta boshqaradigan bo‘ldi. Shu tariqa, Eta Bundesliga tarixidagi birinchi ayol bosh murabbiyga aylanadi.

34 yoshli mutaxassis joriy mavsumda “Union Berlin”ning U-19 jamoasini boshqarib kelayotgan edi. U yozda ayollar jamoasi bosh murabbiyi etib tayinlanishidan oldin, asosiy jamoani mavsum oxirigacha boshqaradi. Eta 2023 yil noyabr oyida Marko Grote qo‘l ostida yordamchi murabbiy bo‘lib ishlagan, shuningdek, Nenad Belisa davrida ham murabbiylar shtabida bo‘lgan edi.

Berlin klubi jadvalning eng quyi qismidagi “Haydenhaym”dan qabul qilingan 1:3 hisobidagi mag‘lubiyatdan so‘ng ushbu o‘zgarishni e’lon qildi. Jamoa hozirda xavfli hududdagi “Sant-Pauli”dan 7 ochko oldinda bormoqda.

Klubning professional futbol bo‘yicha direktori Xorst Xeldt vaziyat xatarli bo‘lib qolayotganini ta’kidlagan.

“Ligadagi o‘rnimizni saqlab qolish uchun bizga zudlik bilan ochkolar kerak. Qishki tanaffusdan keyingi 14 o‘yinda atigi ikki g‘alaba va so‘nggi haftalardagi o‘yinlar hozirgi tarkib bilan vaziyatni o‘nglay olishimizga ishonch bermadi. Shu bois o‘zgarishlarni amalga oshirishga qaror qildik”, deydi Xeldt.

Mari-Luiza Eta esa o‘z tayinlovi haqida shunday fikr bildirdi:

“Bundesligadagi o‘rnimiz hali kafolatlanmagan. Klub bunday qiyin vazifani menga ishonib topshirganidan xursandman. "Union"ning kuchli tomonlaridan biri qiyin vaziyatlarda birlasha olishidir. Jamoa bilan muhim ochkolarni qo‘lga kiritishimizga ishonaman”.

Eta 18 aprel kuni “Volfsburg”ga qarshi o‘yinda Bundesliga tarixidagi birinchi ayol bosh murabbiy sifatida jamoasini maydonga boshlab tushadi.