Angliya Premyer-ligasining bir qator klublari 16 yoshli vinger Jeremi Mongani sotib olish imkoniyatini ko‘rib chiqmoqda. Bu haqda TEAMtalk nashri xabar bermoqda.

Monga ayni damda Chempionshipda ishtirok etayotgan «Lester» sharafini himoya qilmoqda. U asosiy jamoadagi debyutini o‘tgan yili «Nyukasl»ga qarshi o‘yinda o‘tkazgan edi. Ko‘p o‘tmay, ingliz futbolchisi boshqa jamoalarning qiziqishiga qaramay, «tulkilar» bilan stipendial shartnoma imzolab, o‘z kelajagini ushbu klub bilan bog‘ladi.

Ta’kidlanishicha, bu holat futbolchiga bo‘lgan qiziqishni susaytirmagan. Uni o‘z safida ko‘rishni istaganlar orasida Manchesterning ikki grand klubi «MYU» va «Siti» hamda Londonning «Arsenal» jamoasi bor.

Monga joriy mavsumda «Lester» safida 35 ta o‘yinda maydonga tushib, 1 ta gol urdi va 2 ta golli uzatmani amalga oshirdi.