Kiprda o‘tkazilayotgan shaxmat bo‘yicha 2026-yilgi Nomzodlar turniri o‘zbekistonlik grossmeyster Javohir Sindorov uchun muvaffaqiyatli davom etmoqda. Musobaqaning 12-turida Sindorov dunyoning eng kuchli shaxmatchilaridan biri Hikaru Nakamuraga qarshi dona surdi.

Ushbu bahs 33-yurishdayoq durang natija bilan yakunlandi. Mazkur natija evaziga Javohir turnir jadvalidagi peshqadamligini mustahkamladi. Ayni paytda Sindorov 9 ochko bilan 1-o‘rinni egallab turibdi. U eng yaqin ta’qibchisi Anish Giridan 2,5 ochko oldinga o‘tib oldi. Biroq niderlandiyalik shaxmatchi xitoylik Vey Iga qarshi bahsda hozircha kichik ustunlikka ega.
Agar Anish Giri bugun Vey Iga mag‘lub bo‘lsa, Sindorov musobaqa yakuniga 2 tur qolganda g‘oliblikni qo‘lga kiritadi.

Umuman olganda, o‘zbekistonlik shaxmatchilar orasida ilk bor Nomzodlar turnirida qatnashayotgan Sindorov musobaqani hali ham mag‘lubiyatsiz davom ettirmoqda.

15-aprelga qadar davom etadigan mazkur turnir g‘olibi amaldagi jahon chempioni Gukesh Dommarajuga qarshi shaxmat toji uchun kechadigan bahsda ishtirok etish huquqini qo‘lga kiritadi. 14 turdan iborat musobaqaning umumiy sovrin jamg‘armasi 700 ming AQSH dollarini tashkil etadi.