Madridning «Atletiko» klubi darvozaboni Yan Oblak Chempionlar ligasi 1/4 finali doirasida «Barselona»ga qarshi kechadigan javob uchrashuvida ishtirok etishi mumkin.
Sloveniyalik posbon jarohatidan qutilgan va maydonga qaytishga tayyor, deb xabar bermoqda jurnalist Pedro Fulyana. Diyego Simeone «ko‘k-anorranglilar» bilan bo‘lajak bahsda 33 yoshli darvozabonni asosiy tarkibga kiritishi kutilmoqda, biroq yakuniy qaror hali qabul qilinmagan.
«Matraschilar»ning «Barselona» bilan uchrashuvi 14 aprel kuni Madridda bo‘lib o‘tadi. Yan Oblak jamoasining oxirgi oltita o‘yinini, shu jumladan, kataloniyaliklarga qarshi kechgan va 2:0 hisobidagi g‘alaba bilan yakunlangan dastlabki bahsni ham o‘tkazib yuborgan edi.
