Seshanba kuni «Barselona» Chempionlar ligasi 1/4 finalining javob uchrashuvi doirasida Madridning «Atletiko» jamoasi mehmoni bo‘ladi. O‘tgan chorshanba kuni bo‘lib o‘tgan dastlabki bahsda kataloniyaliklar o‘z maydonlarida 0:2 hisobida imkoniyatni boy berishgan edi.
Insayder Xavi Migelning xabar berishicha, Jerar Martin «matraschilar»ga qarshi bo‘lajak o‘yinda ishtirok eta olishi kutilmoqda. Xans-Diter Flik 24 yoshli futbolchini mudofaa markazida Erik Garsiya bilan birga tushirishni rejalashtirmoqda.
Eslatib o‘tamiz, Jerar Martin La Liga doirasidagi «Espanyol»ga qarshi kechgan so‘nggi o‘yinning birinchi bo‘limidan so‘ng jarohat tufayli almashtirilgan edi.
Shuningdek, «ko‘k-anorranglilar»ning asosiy markaziy himoyachisi Pau Kubarsi diskvalifikasiya sababli «Atletiko» bilan javob uchrashuvini o‘tkazib yuboradi — u dastlabki o‘yinda qizil kartochka olgan edi.
