Сешанба куни «Барселона» Чемпионлар лигаси 1/4 финалининг жавоб учрашуви доирасида Мадриднинг «Атлетико» жамоаси меҳмони бўлади. Ўтган чоршанба куни бўлиб ўтган дастлабки баҳсда каталонияликлар ўз майдонларида 0:2 ҳисобида имкониятни бой беришган эди.

Инсайдер Хави Мигелнинг хабар беришича, Жерар Мартин «матрасчилар»га қарши бўлажак ўйинда иштирок эта олиши кутилмоқда. Ханс-Дитер Флик 24 ёшли футболчини мудофаа марказида Эрик Гарсия билан бирга туширишни режалаштирмоқда.

Эслатиб ўтамиз, Жерар Мартин Ла Лига доирасидаги «Эспаньол»га қарши кечган сўнгги ўйиннинг биринчи бўлимидан сўнг жароҳат туфайли алмаштирилган эди.

Шунингдек, «кўк-анорранглилар»нинг асосий марказий ҳимоячиси Пау Кубарси дисквалификация сабабли «Атлетико» билан жавоб учрашувини ўтказиб юборади — у дастлабки ўйинда қизил карточка олган эди.