Fransiya terma jamoasining sobiq futbolchisi Patris Evra «Barselona»ning Chempionlar ligasida «Atletiko» to‘sig‘idan o‘tish imkoniyatlari yo‘q deb hisoblaydi. Seshanba kuni jamoalar Madridda javob uchrashuvini o‘tkazadi.
«Ular Chempionlar ligasida g‘alaba qozonishdan ko‘ra, navbatdagi qizil kartochkani olishlari ehtimoli yuqoriroq. So‘nggi vaqtlarda chetlatilishlar ular uchun odatiy holga aylanib qoldi. Men Diyego Simeone va uning futbolchilariga to‘liq ishonaman. Ular — haqiqiy jangchilar, ular yaxshi tayyorgarlik ko‘rishgan va «Barselona»ni to‘xtatishga tayyor», — deya Evraning so‘zlaridan iqtibos keltiradi Ispaniyaning Sport nashri.
Eslatib o‘tamiz, o‘tgan haftada «Barselona» o‘z maydonida «Atletiko»ga 0:2 hisobida imkoniyatni boy bergan edi. O‘sha o‘yinda Xulian Alvares va Aleksandr Syorlot gol muallifiga aylanishgandi.
