«Liverpul» yarim himoyachisi Dominik Soboslai Chempionlar ligasi chorak finali doirasidagi «PSJ»ga qarshi javob o‘yini oldidan o‘z fikrlarini bildirdi. Dastlabki bahsda inglizlar Parijda 0:2 hisobida mag‘lub bo‘lishgan edi. Javob uchrashuvi bugun Liverpulda bo‘lib o‘tadi. O‘yin Toshkent vaqti bilan soat 00:00 da (16 aprelga o‘tar kechasi) boshlanadi.
«Men ertaga maydonda o‘lishga ham tayyorman. Barcha futbolchilar nomidan gapirishim mumkin — biz g‘alaba qozonishni juda ham xohlaymiz va buning uchun borimizni berib ishlaymiz. «Enfild»da har qanday voqea sodir bo‘lishi mumkin. Bu mutlaqo boshqacha o‘yin bo‘ladi», — deya futbolchining so‘zlarini jurnalist Fabrisio Romano yetkazmoqda.
Joriy mavsumda Soboslai hisobida APLda 30 ta o‘yin, 5 ta gol va 3 ta golli uzatma mavjud. Transfermarkt portali yarim himoyachini 100 mln yevroga baholamoqda.
