Madridning «Atletiko» klubi yarim himoyachisi Koke Chempionlar ligasi 1/4 finalining javob uchrashuvi oldidan o‘z fikrlari bilan o‘rtoqlashdi. Birinchi bahsda «Barselona» ustidan qozonilgan 2:0 hisobidagi g‘alabadan so‘ng, poytaxt klubi qo‘lga kiritilgan ustunlikni boy bermaslikka harakat qiladi.
«Barselona»dagilar vaziyatni o‘nglay olishlariga ishonishayotgani — bu tabiiy hol. Agar ishonishmaganda, bu g‘alati bo‘lardi. O‘z stadionimizda kuchli raqibga qarshi kechadigan ajoyib o‘yinni katta hayajon bilan kutmoqdamiz», — deya futbolchining so‘zlarini UYEFA rasmiy sayti keltiradi.
Shuningdek, Koke bundan 12 yil avval Chempionlar ligasi chorak finalida «Barselona» darvozasiga urgan golini ham yodga oldi. U ushbu lavhani o‘ziga qo‘shimcha motivasiya berishiga umid qilib, bir necha bor qayta tomosha qilganini ta’kidlab o‘tdi.
