«Bavariya»ning afsonaviy darvozaboni Manuel Noyer, turli mish-mishlarga qaramay, Angliya Premyer-ligasining biror-bir klubi bilan muzokara olib borayotgani yo‘q. Bu haqda nufuzli insayder Fabrisio Romano xabar bermoqda.

Manbaning ma’lumotiga ko‘ra, Noyer hozirda bor e’tiborini mavsumning hal qiluvchi pallasiga qaratgan. U «Bavariya» bilan amaldagi shartnomasini yana bir yilga uzaytirish yoki uzaytirmaslik masalasini mavsum yakunlanganidan keyin hal qiladi.

Mart oyi oxirida germaniyalik posbon 40 yoshni qarshi oldi. Joriy mavsumda Noyer barcha turnirlarda 32 ta o‘yinda ishtirok etib, 30 ta gol o‘tkazib yubordi va 11 ta uchrashuvda o‘z darvozasi daxlsizligini saqlab qoldi.