Mikel Artetadan Chempionlar Ligasi chorak finali doirasidagi «Sporting»ga qarshi javob o‘yini oldidan «Arsenal» futbolchilari va muxlislariga aytadigan gapi bor-yo‘qligi haqida so‘rashdi. Portugaliyadagi birinchi bahs «kanonirlar»ning 1:0 hisobidagi g‘alabasi bilan yakunlangan edi.

«Bir tomchi ham qo‘rquv yo‘q, faqatgina toza olov. Bor gap shu.

Men futbolchilarda, muxlislarda va o‘zimda aynan mana shunday shijoatni ko‘rishni istayman. Oldimizdagi imkoniyat — shunchaki aql bovar qilmaydigan darajada. Keling, unga tik boqaylik, buni amalga oshiraylik va bor kuchimizni ishga solaylik.

Olov. Men yonyapman. Tamom. Boshqa hech narsa kerak emas. Men juda hayajondaman. Bu darajaga yetib kelish uchun juda ko‘p ish qildim. Ushbu klub bilan nimalar sodir bo‘lganini yaxshi bilaman. Bu — go‘zal jarayon.

Men go‘zallikni va imkoniyatni ko‘ryapman. Biz bilan bir yo‘lda ketayotgan barcha insonlar uchun bu ishni oxirigacha yetkazib qo‘ymoqchiman. Meni har kuni mana shu narsa ruhlantiradi. Qo‘rquv nolga teng», — dedi «Arsenal» bosh murabbiyi.

Ertaga, 15 aprel kuni Londondagi «Emireyts» stadionida kechadigan bahs oldidan Artetaning bu so‘zlari jamoadagi jangovar ruhni yanada ko‘targani aniq. O‘yin Toshkent vaqti bilan 16 aprelga o‘tar kechasi soat 00:00 da boshlanadi.