«Barselona» yana Chempionlar ligasida zafar qucha olmaydigan bo‘ldi – bu safar «Atletiko» yengib bo‘lmas to‘siqqa aylandi. Xans-Diter Flik jamoasi o‘z maydonidagi dastlabki uchrashuvda 0:2 hisobida imkoniyatni boy bergan bo‘lsa, safarda 2:1 hisobida g‘alaba qozondi. Biroq ikki o‘yin natijasiga ko‘ra «matraschilar» keyingi bosqichga yo‘l oldi.

«Juda ayanchli yakun, ammo biz keyingi mavsumda yana urinib ko‘ramiz. Bizda yosh jamoa bor va biz o‘sishda davom etamiz. O‘yinchilar saboq chiqarishi kerak. Bizning vazifamiz esa — ularga bu borada yordam berish», — dedi germaniyalik mutaxassis matbuot anjumanida.

O‘tgan mavsumda — Flik boshqaruvidagi debyut yilida — «Barselona» Chempionlar ligasining yarim finalida Milanning «Inter» klubiga mag‘lub bo‘lib, musobaqani tark etgan edi.