“Bavariya” va Germaniya terma jamoasining sobiq himoyachisi Filipp Lam myunxenliklar darvozaboni Manuel Noyer haqida yuqori fikr bildirdi. Ular avval “Bavariya” safida birga to‘p surishgan.

“Noyer — asrda bir marta dunyoga keladigan darvozabonlardan. U bu pozisiya uchun zarur bo‘lgan barcha iqtidor va sifatlarga ega: sakrovchanlik, chaqqonlik, reaksiya, jismoniy kuch va epchillik. U xarizmaga, maydondagi ta’sirchanlikka va o‘z kasbiga bo‘lgan ulkan sadoqatga ega. Va 40 yoshida ham, o‘tgan hafta ko‘rsatganidek, u hali ham eng yuqori darajada o‘ynay oladi.

Manuel — o‘yinda faol ishtirok etishni istaydigan darvozabon. Bu oddiy gapdek tuyulishi mumkin, lekin u deyarli qo‘shimcha maydon o‘yinchisidek harakat qiladi, o‘ng va chap oyoqda birdek ishonchli o‘ynaydi. U bizga himoyadan hujumni boshlashda yordam berardi, chunki uning paslari bosim ostida qolmasligimizni ta’minlardi. Bunday darvozabon bilan jamoa murakkab vaziyatlarda ancha ishonch bilan o‘ynaydi. Biz unga va u taqdim etadigan pas variantlariga deyarli har qanday vaziyatda ishonar edik.

Albatta, Manuel Noyer kabi o‘yinchilar har kuni uchramaydi. U Lionel Messi yoki Krishtianu Ronaldu kabi tarixdagi eng buyuk futbolchilar qatoriga kiradi va u haqiqatan ham “Oltin to‘p”ni qo‘lga kiritishga loyiq edi”, — deb yozdi Lam The Athletic nashridagi minbarida.