«Bavariya» bosh murabbiyi Vensan Kompani Chempionlar Ligasi 1/4 finali doirasida Madridning «Real» klubiga qarshi kechgan javob o‘yinidan so‘ng jurnalistlar bilan suhbatlashdi. Myunxenliklar o‘z maydonlarida bahs so‘nggida urilgan ikkita gol evaziga g‘alaba qozonishdi (4:3) va ikki o‘yin natijasiga ko‘ra (6:4) yarim finalga yo‘l olishdi.

«Juda hissiyotlarga boy o‘yin bo‘ldi. Biz to‘pga ko‘p egalik qildik va har soniyada gol urishimiz mumkinligini his qilib turdik. Lekin «Real» — bu «Real». Ularda istalgan lahzada jazolay oladigan juda tezkor futbolchilar bor.

Bugun jamoamiz ruhiy barqarorlik namoyish etdi va qiyinchiliklarga to‘g‘ri munosabat bildirdi. Muxlislarning qo‘llab-quvvatlashi ham muhim rol o‘ynadi. Biz xotirjamlikni saqlab qoldik va o‘z vaqtimiz kelishini sezdik. Haqqoniy g‘alaba», – dedi Kompani DAZN nashriga bergan intervyusida.

Yarim finalda «Bavariya» Fransiyaning «PSJ» jamoasi bilan kuch sinashadi. Madridliklarning musobaqadagi yurishi esa Myunxenda to‘xtadi.