Londonning «Arsenal» jamoasi UYEFA Chempionlar Ligasining 2025/2026 yilgi mavsumida hali biror marta mag‘lubiyatga uchramagan yagona jamoa bo‘lib turibdi. 1/4 final javob bahsida «kanonirlar» Lissabonning «Sporting» klubi bilan durang (0:0) o‘ynashdi va musobaqaning yarim finaliga yo‘l olishdi.

Jamoalar o‘rtasidagi bir hafta oldin bo‘lib o‘tgan dastlabki uchrashuv londonliklarning kichik (1:0) hisobidagi g‘alabasi bilan yakunlangan edi. Mikel Arteta shogirdlari joriy turnirda (umumiy bosqichni ham hisobga olganda) o‘tkazilgan 12 ta o‘yinning 10 tasida g‘alaba qozonib, 2 tasida durang qayd etishdi.

Chempionlar Ligasining 1/2 finalida «Arsenal» Madridning «Atletiko» jamoasiga qarshi bahs olib boradi. Eslatib o‘tamiz, bir kun avval «matraschilar» ikki o‘yin natijasiga ko‘ra «Barselona»ni (2:0, 1:2) musobaqadan chiqarib yuborib, yarim finalga yo‘l olgan edilar.