Лондоннинг «Арсенал» жамоаси УЕФА Чемпионлар Лигасининг 2025/2026 йилги мавсумида ҳали бирор марта мағлубиятга учрамаган ягона жамоа бўлиб турибди. 1/4 финал жавоб баҳсида «канонирлар» Лиссабоннинг «Спортинг» клуби билан дуранг (0:0) ўйнашди ва мусобақанинг ярим финалига йўл олишди.

Жамоалар ўртасидаги бир ҳафта олдин бўлиб ўтган дастлабки учрашув лондонликларнинг кичик (1:0) ҳисобидаги ғалабаси билан якунланган эди. Микель Артета шогирдлари жорий турнирда (умумий босқични ҳам ҳисобга олганда) ўтказилган 12 та ўйиннинг 10 тасида ғалаба қозониб, 2 тасида дуранг қайд этишди.

Чемпионлар Лигасининг 1/2 финалида «Арсенал» Мадриднинг «Атлетико» жамоасига қарши баҳс олиб боради. Эслатиб ўтамиз, бир кун аввал «матрасчилар» икки ўйин натижасига кўра «Барселона»ни (2:0, 1:2) мусобақадан чиқариб юбориб, ярим финалга йўл олган эдилар.