"The Athletic" nashri «Real»ning Chempionlar ligasidan «Bavariya»ga (4:6) mag‘lub bo‘lib chiqib ketganidan so‘ng, klub rahbariyati bosh murabbiy Alvaro Arbeloa o‘rniga ko‘rib chiqayotgan nomzodlar ro‘yxatini oshkor qildi.

Manbaga ko‘ra, madridliklar quyidagi mutaxassislarni o‘rganmoqda:

- Yurgen Klopp;
- Zinedin Zidan;
- Didye Desham;
- Maurisio Pochettino.

Klopp klub rahbariyati orasida katta hurmatga ega, ammo uning «Red Bull» tizimida ishlashni davom ettirish istagi tufayli bu transfer ehtimoli past baholanmoqda.

Zinedin Zidanni esa klub prezidenti Florentino Peres yana jamoaga qaytarishni istamoqda. Biroq fransiyalik murabbiyning Fransiya milliy jamoasi bilan yaqin aloqasi borligi va u 2026 yilgi Jahon chempionatidan keyin Didye Desham o‘rnini egallashi kutilmoqda.

Ayni paytda Peres uchun eng qiziq variant — Maurisio Pochettinoni taklif qilish. Kutilishicha, u Jahon chempionatidan so‘ng AQSH milliy jamoasidagi faoliyatini yakunlashi mumkin. Biroq argentinalik mutaxassis hali ketish bo‘yicha yakuniy qaror qabul qilmagan va JCHdan keyin ham AQSHda qolish ehtimolini istisno etmagan.