«Bavariya» himoyachisi Yosip Stanishich Antonio Ryudiger uni haqorat qilganini aytdi. Chempionlar ligasi chorak finalidan o‘rin olgan javob uchrashuvi davomida germaniyalik futbolchi xorvatiyalik himoyachini muayyan so‘z bilan haqoratlagan, biroq Stanishich bu so‘zni oshkor qilmaslikni afzal ko‘rdi.
«Maydonda yotgan paytimda Ryudigerdan nimalarni eshitganim haqida gapirib o‘tirmayman. Yaxshisi, buni uning o‘zidan so‘rang. Mening fikrimcha, bu qabul qilib bo‘lmas holat. U faqat bitta so‘z aytdi, o‘ziyam ikki marta. Unga shu savolni berib ko‘ring — balki hammasini tan olishga jasorati yetar. Men adovat tarafdori emasman, shuning uchun tafsilotlarni ochiqlamayman. Ha, u buni hissiyotlar ostida aytdi, lekin baribir bunga yo‘l qo‘yib bo‘lmaydi», – dedi Stanishich Kicker nashriga bergan intervyusida.
«Bavariya» 4:3 (ikki o‘yin natijasiga ko‘ra 6:4) hisobida g‘alaba qozonib, yarim finalga yo‘l oldi. U yerda myunxenliklar «PSJ» bilan kuch sinashadi.
