Milanning «Inter» klubi «Komo» hujumkor yarim himoyachisi Niko Pasga qiziqish bildirmoqda. Bu haqda La Repubblica nashri xabar bermoqda.

Manbaning ma’lumotiga ko‘ra, «neradzurrilar» rahbariyati yozda «Komo»ning asosiy yulduzini sotib olish uchun mablag‘ sarflashga tayyor. 21 yoshli xavbekning transferi «Inter»ga kamida 50 million yevroga tushadi — klub bu mablag‘ni «Barselona» qiziqish bildirayotgan Alessandro Bastonini sotish orqali qo‘lga kiritishni rejalashtirmoqda.

Joriy mavsumda Madridning «Real» klubi tarbiyalanuvchisi barcha turnirlarda 35 ta o‘yinda maydonga tushib, 12 ta gol urdi va 7 ta golli uzatmani amalga oshirdi. Argentinalik futbolchining «Komo» bilan amaldagi shartnomasi 2028 yilda yakuniga etadi.