Turinning «Yuventus» klubi sobiq darvozaboni, 48 yoshli Aleksander Manninger yo‘l-transport hodisasi qurboni bo‘ldi. Bu haqda dastlab Avstriyaning «Red Bull Zalsburg» klubi, so‘ngra «Yuventus» va «Arsenal» matbuot xizmatlari xabar tarqatdi.
Ma’lumotlarga ko‘ra, fojia bugun ertalab Avstriyaning Nusdorf shahrida yuz bergan. Manninger boshqarib borayotgan avtomobil temir yo‘l kesishmasida yo‘lovchi poyezdi bilan to‘qnashib ketgan. Qutqaruvchilarning harakatlariga qaramay, sobiq futbolchining hayotini saqlab qolishning imkoni bo‘lmagan.
Manninger faoliyati davomida «Arsenal», «Yuventus», «Fiorentina» va «Liverpul» kabi grand klublarda to‘p tepgan. U 1998 yilda «Arsenal» bilan APLda, 2012 yilda esa «Yuventus» bilan A Seriyada chempionlikni qo‘lga kiritgan edi.
