Туриннинг «Ювентус» клуби собиқ дарвозабони, 48 ёшли Александер Маннингер йўл-транспорт ҳодисаси қурбони бўлди. Бу ҳақда дастлаб Австриянинг «Ред Булл Зальцбург» клуби, сўнгра «Ювентус» ва «Арсенал» матбуот хизматлари хабар тарқатди.
Маълумотларга кўра, фожиа бугун эрталаб Австриянинг Нусдорф шаҳрида юз берган. Маннингер бошқариб бораётган автомобиль темир йўл кесишмасида йўловчи поезди билан тўқнашиб кетган. Қутқарувчиларнинг ҳаракатларига қарамай, собиқ футболчининг ҳаётини сақлаб қолишнинг имкони бўлмаган.
Маннингер фаолияти давомида «Арсенал», «Ювентус», «Фиорентина» ва «Ливерпуль» каби гранд клубларда тўп тепган. У 1998 йилда «Арсенал» билан АПЛда, 2012 йилда эса «Ювентус» билан А Серияда чемпионликни қўлга киритган эди.
