Argentinalik hujumchi Diyego Milito 2010 yilgi Chempionlar ligasi finalida ikkita gol urib, o‘z klubi «Inter»ning Myunxenning «Bavariya» jamoasi ustidan 2:0 hisobidagi g‘alabasini ta’minlagan edi. U o‘sha afsonaviy o‘yinga qanday ruhiy tayyorgarlik ko‘rganini yodga oldi.
«O‘yin oldidan klubdagi argentinalik futbolchilar bilan yig‘ilib, kechqurun Malvin orollari tarixi haqidagi filmni tomosha qildik. Bu biz uchun ertasi kuni maydonga tushish oldidan juda kuchli ruhiy quvvat bo‘ldi», — dedi Milito «derbyderbyderby.it» nashriga bergan intervyusida.
Eslatib o‘tamiz, Malvin orollari ko‘proq Folklend orollari nomi bilan mashhur. Bu hududning inglizcha nomi bo‘lib, Argentina va Angliya o‘rtasida ushbu orollar ustida uzoq yillik nizo mavjud, hatto 1982 yilda bu holat urushgacha yetib borgan. Argentina uchun bu masala xuddi Moskva va Kiyev o‘rtasidagi murakkab munosabatlardagi «Qrim masalasi» kabi o‘ta nozik va muhim mavzu hisoblanadi.
