Аргентиналик ҳужумчи Диего Милито 2010 йилги Чемпионлар лигаси финалида иккита гол уриб, ўз клуби «Интер»нинг Мюнхеннинг «Бавария» жамоаси устидан 2:0 ҳисобидаги ғалабасини таъминлаган эди. У ўша афсонавий ўйинга қандай руҳий тайёргарлик кўрганини ёдга олди.
«Ўйин олдидан клубдаги аргентиналик футболчилар билан йиғилиб, кечқурун Мальвин ороллари тарихи ҳақидаги фильмни томоша қилдик. Бу биз учун эртаси куни майдонга тушиш олдидан жуда кучли руҳий қувват бўлди», — деди Милито «derbyderbyderby.it» нашрига берган интервьюсида.
Эслатиб ўтамиз, Мальвин ороллари кўпроқ Фолкленд ороллари номи билан машҳур. Бу ҳудуднинг инглизча номи бўлиб, Аргентина ва Англия ўртасида ушбу ороллар устида узоқ йиллик низо мавжуд, ҳатто 1982 йилда бу ҳолат урушгача етиб борган. Аргентина учун бу масала худди Москва ва Киев ўртасидаги мураккаб муносабатлардаги «Қрим масаласи» каби ўта нозик ва муҳим мавзу ҳисобланади.
