«Braga» bosh murabbiyi Karlos Visens Yevropa Ligasi chorak final javob uchrashuvida «Betis»ga qarshi o‘yinda qanday qilib kambek amalga oshirishgani haqida gapirib berdi.
Jamoalar o‘rtasidagi ilk bahs 1:1 hisobida yakunlangan edi. Javob o‘yinining birinchi bo‘limi davomida «Braga» 0:2 hisobida imkoniyatni boy berayotgan edi, biroq yakunda raqib darvozasiga to‘rtta to‘p kiritishga muvaffaq bo‘ldi.
«Eng muhimi, «Braga» qo‘rqmasdan o‘ynashda, yuqori pressing qilishda va chiziqlar orasida harakat qilishda davom etdi. Ikkinchi bo‘lim boshidagi mana shu tajovuzkor o‘yin gollarga olib keldi va bizga vaziyatni o‘nglash imkonini berdi», — deya mutaxassisning so‘zlarini keltiradi UEFA matbuot xizmati.
Visens «Braga» o‘yin boshida «Betis»ning kuchli bosimiga dosh bera olmaganini tan oldi, biroq jamoa iroda va xarakter ko‘rsata olganini ta’kidladi. Yarim finalda portugaliyaliklar «Frayburg» bilan kuch sinashadilar.
