Madridning «Real» klubi o‘ng qanot himoyachisi Trent Aleksander-Arnold yozgi transfer oynasida hech qayerga ketmaydi.
Angliyalik futbolchining Ispaniyaga ko‘chib o‘tgandan keyingi ilk mavsumi turlicha taassurot qoldirmoqda: u asosiy tarkibga darrov kirishib keta olmadi, jamoa esa mavsumni sovrinsiz yakunlash xavfi ostida turibdi. Biroq, barcha mish-mishlarga qaramay, «Real» Trentning o‘yinlaridan mamnun. 27 yoshli futbolchi yaqin kelajakda klubni tark etmasligi aniq — uning ketishi borasida hatto muzokara ham olib borilmayapti.
Aleksandr-Arnold o‘tgan yil yozi boshida «Liverpul»dan «qaymoqranglilar» safiga kelib qo‘shilgan edi. Futbolchining La Liga grandi bilan tuzilgan mehnat shartnomasi 2031 yilgacha mo‘ljallangan.
