«Bornmut» jamoasi barchani hayratda qoldirishda davom etmoqda. Shanba kuni Andoni Iraola shogirdlari safarda «Nyukasl»ni 2:1 hisobida mag‘lub etdi.

Buning natijasida «Bornmut»ning Premyer-ligadagi mag‘lubiyatsiz seriyasi 13 ta o‘yinga yetdi. Ushbu seriya davomida «olchalar» olti bor g‘alaba qozonishdi va yetti marta durang qayd etishdi. Qizig‘i shundaki, ayni damda aynan «Bornmut» Yevropaning top-5 ligalari ichida eng uzoq davom etayotgan mag‘lubiyatsiz seriyaga ega bo‘lib turibdi.

Shuningdek, ta’kidlash joizki, «Bornmut»ning bu muvaffaqiyatli seriyasidan «Liverpul» (3:2 g‘alaba), «Manchester Yunayted» (2:2 durang) va «Arsenal» (2:1 g‘alaba) kabi jamoalarga qarshi o‘yinlar ham o‘rin olgan. Bir necha kun oldin «Bornmut» mavsum yakunlanganidan keyin Andoni Iraola murabbiylik lavozimini tark etishini e’lon qilgan edi.