Madridning «Real» klubi vingeri Franko Mastantuono joriy mavsum yakunidan so‘ng jamoani tark etishi mumkin.

18 yoshli futbolchi «qaymoqranglilar» tarkibida o‘z o‘rnini yo‘qotib qo‘ydi — endilikda u nafaqat asosiy tarkibga kirmayapti, balki doim ham zaxiradan maydonga tushirilmayapti.

Ispaniya ommaviy axborot vositalarining xabariga ko‘ra, «qirollik klubi» rahbariyati argentinalik futbolchini ijaraga berib yuborishga tayyor, biroq bu ijara faqat yarim yilga — keyingi mavsumning o‘rtasiga qadar davom etadi. Franko Mastantuono o‘tgan yilning yozida Argentinaning «River Pleyt» klubidan Ispaniya grandi safiga kelib qo‘shilgan edi. Istiqbolli futbolchining shartnomasi 2031 yilgacha mo‘ljallangan bo‘lib, uning bozor qiymati Transfermarkt portali tomonidan 45 million yevroga baholanmoqda.